ދުވާލަކު އެތައް ސަތޭކަ ޑޮލަރެއް ގޭގައި ހުރެގެން ހޯދާނެ މަގެއް..؟

”ފަސޭހަކަމާއި އެކު ގޭގައި ތިބެގެން ކުދިން ބަލަމުން ރަނގަޅު އާންމުދަނީ އެއް ހޯދިދާނެއެވެ. މިފަދަ ވަޒީފާއަކަށް ބޭނުންވަނީ ކޮންޕިއުޓާރ އަދި އިންޓަރނެޓް ކަނެކްޝަންއެކެވެ.  މި މަސައްކަތުން ދުވާލެއްގެ މައްޗައް އެތައް ސަތޭކަ ޑޮލަރ ލިބޭނެއެވެ. އެހެންވީމަ މި ފުރުސަތު ދޫކޮށްނުލާ ކުރިޔަށް ދާން ހިނގާށެވެ.“  މީގެ ހަގީގަތަަކީ ކޮބާތޯއެވެ؟ މިއީ ގިނަ ސްކޭމް ތަށް ފެށެމުން އަންނަގޮތެވެ. މީހުންގެ ޝައުގުވެރިކަން ލިބޭގޮތަށް ވާހަކަ ދަށްކައިގެން ކުށެއް ނެތް އެތައް ބަޔަކު އެމީހުންގެ މަޅީގައި ޖައްސައެވެ. މިފަދަ ސްކޭމްތަކުގައި ޖެހޭ މީހުން މަދެއް ނޫނެވެ.  އަދި ސްކޭމްއެއްކަން އެނގޭއިރު ގިނަ ފަހަރަށް އޮންނަނީ އަތުން ފައިސާތަކެއް ގޮސް ބޮޑު ގެއްލުމެއްވެފައެވެ. މިހާރަކަށް އައިސް އަނެއްކާވެސް މިހާރު މިވަނީ އޮޓޯމޭޓެޑް ޕޭ ޑޭސްގެ ނަމުގައި މާ ފަސޭހައިން ފައިސާތައް ލިބޭނެ ކަމަށް ބުނާ އެޑް ތަކެއް އިންޓަރނެޓްގައި އާންމުވެފައެވެ. އެ އެޑްތަކުގައިވާ ލިންކްތަކަށް ވަންނައިރު ވަދަވޭ ސައިޓްތަކަކީ ކޮންބައެއްގެ ސައިޓް ތަކެއްކަން ނެގޭ ސައިޓްތަކެކެވެ.

އޮޓޯމޯޓެޑް ޕޭޑޭސް އާއި ބެހޭގޮތުން މިހާތަނަށް ހޯދުނު މައުލޫމާތުން މިއީވެސް ސްކޭމްއެއް ކަމަށް ތަޖުރިބާކުރި ފަރާތްތަކުން ވަނީ ބުނަންފަށާފައެވެ. އަދި މި އިސްތިހާރުކުރާ ސައިޓް( http://financereports24-7.com/1p/us/  ގައި ވާގޮތުން ވާރނިންގ ޖަހާފަ ޑެޑްލައިން ކަމަށް ވަކި ދުވަހެއް ޖަހާފައިވެއެވެ. މިގޮތުން 10 ވަނަ ދުވަހު އަޅުގަނޑު ބެލިއިރު ވާރނިންގ ޑެޑްލައިން ޖަހާފައި އިނީ 11 އަކީ އެންމެ ފަހު ދުވަސް ކަމަށެވެ. ދެން ހަމަ އެއާ ޖެހިގެން 11 ވަނަ ދުވަހު ބެލިއިރު ޑެޑް ލައިންކަމަށް އިނީ12 ވަނަ ދުވަހެވެ. ދެން 12 ވަނަ ދުވަހު ބެލިއިރު ޑެޑް ލައިންއަކީ 13 އެވެ. މިތަންކޮޅު ވަނީ ދޮންކުލައިން ހައިލައިޓްކޮށްފައެވެ. އަދި ސައިޓްގެ ވެރި ފަރާތަކީ ކޮބައިކަން ކޮން ގައުމެއްގެ ބައެއްކަންވެސް އެނގެން ނެތްކަން ފާހަގަކުރެވެއެވެ. މީގެ ލިންކްތައް ދަނީ އިންޓަރނެޓްގައި ވަރަށްބާރަށް ފެތުރެމުންނެވެ. އަދި މިކަމަކީ ސަމާލުވާން ޖެހޭކަމެކެވެި. ރަޖިސްޓާރ ވުމަށް ޖެއްސުމުން އެހެން ސައިޓަކަށް އޮޓަމެޓިކުން ދާނެއެވެ. ދެން ޑެޑް ލައިން އިންނަ ސައިޓް އަށް ލޮގިންވާ ނުޖެހޭތީ ޑެޑްލައިންއަށް ވާ ގޮތް ނުފެންނާނެއެވެ. ކޮންމެ އާ މީހަކަށް އަބަދުވެސް ކުރިޔައް 1 ދުވަސްލާފައި ޑެޑް ލައިންކަމަށް ފެންނާނެއެވެ.

.

އޮޓޯމޭޓެޑް ޕޭޑޭސް އަކީ އެމީހުން އިސްތިހާރުކުރާގޮތުން ފައިސާ ހޯދަން ފަސޭހަ މަސައްކަތެކެވެ. އަދި ގޭގައި ތިބެގެން ގިނަ ފައިސާތަކެއް ހޯދޭނެ މަގެކެވެ. އަދި މީގެ ޖާދޫގައި މީހުން ޖައްސަން ވަރަށް ރީތިކޮށް ފައިސާ ލިބޭނެ އަދަދުތައް ޖަހާފައިވެއެވެ. މިކަމާއި ބެހޭގޮތުން ތަޖުރިބާކުރި ގިނަ ފަރާތްތަކުން ބުނާގޮތުން އެ ފަރާތްތަކުގެ އަތުން ވަނީ ގިނަ ފައިސާތަކެއް ގެއްލިފައެވެ. އަދި ރިފަންޑްކުރަން ގުޅޭނެ ގޮތެއް ނެތިގެން 10 އީމެއިލް ފޮނުވުމުންވެސް ޖަވާބު ނުދޭކަމަށާއި ގިނަ އަދަދެއްގެ ފައިސާ ގެއްލުނީކަމަށް އެއް ފަރާތަކުން ބުނެފައިވެއެވެ. އަދި އެ ފަރާތުން ބުނަނީ އަވަހަށް އެ ސައިޓާއި ދުރަށް ދިއުމަށް އެދޭކަމަށާއި އަދި ކުށެއް ނެތް އެތައް ބަޔަކަށް މި ގެއްލުންވާން ނޭދޭ ކަމަށެވެ. .

އޮޓޯމޯޓެޑް ސްކޭމް ތަޖުރިބާކުރި އެހެން ފަރާތަކުން ބުނެފައިވާގޮތުގައި އޭނާ އޭގައި ރަޖިސްޓާރވީ ކުޑަ ދުވަސްކޮޅެއްކުރިން ކަމަށެވެ. އަދި އެއީ 100 ޕަސެންޓް ސްކޭމްއެއް ކަމަށެވެ. އަދި އެކަން އިޙްސާސްވާނީ ރަޖިސްޓާރވާ މީހާ އެމީހުންނަށް ޕޭކުރަން ޖެހޭ ހިސާބުންކަމަށެވެ. އަދި މި ސްކޭމް އަކީ ވަރަށް ސްމާރޓް ސްކޭމްއެއް ކަމަށެވެ.
އޮޓޯމޭޓެޑް ޕޭޑޭ ސްކޭމްގައި ޖެހުނު އެހެން ބައިވެރިޔަކު ބުނާގޮތުން އޭނާ އަތުން އެ ގެއްލުނު ފައިސާ ހޯދާނީ ކިހިނެތްކަން ނޭގޭ ކަމަށާއި އެމީހުންގެ އަތްދަށުނުވުމަށް ހަރު އަޑުން މުޅި ދުނިޔެއައް ގޮވާލާކަމަށެވެ. އަދި ކޮންމެސް ސަރުކާރަކުން މިކަން ހުއްޓުވަން ޖެހޭކަމަށްވެސް ބުނެފައިވެއެވެ.

ފޭކް އޮންލައިން ޕާރމަސީތައް: މިފަދަ ޕާރމަސީތަކުން ޑްރަގް އޮފާރތައް ކުރުމުގެ އިތުރުން ފޭކް ބޭސްތައް ވިއްކައެވެ. ގިނަ ފަހަރަށް  ވިއްކަނީ ވަރަށް އަގުހެޔޮކޮށެވެ. އަދި މަސްހޫރު ބޭސްތަކުގެ ނަމުގައި، މިފަދަ ބޭސްތަކުގެ ސަބަބުން ޞިއްހީ ގިނަ ނުރައްކާ ކުރިމަތިވުމާއި، ބައެއް ފަހަރަށް ގަންނަ ބޭސް ނުލިބުމުގެ މައްސަލަ ކުރިމަތިވެއެވެ. އަދި އަނބުރާ ފައިސާވެސް ނުލިބެއެވެ.

ސްކޭމްކުރާ ފަރާތްތަކުން މީހުންގެ މައުލޫމާތު ހޯދުމަށް ސޯޝަލް ނެޓްވޯރކްގެ ބޭނުން ހިފުމަކީ އާންމުކަމެކެވެ. ބައެއް ފަހަރަށް ސޯޝަލް ނެޓްވާރކްގެ އެކައުންޓް ހެކުކޮށްފައި އެ އެކައުންޓް ބޭނުންކޮށްގެން އަސްލު ވެރި ފަރާތުގެ ނަމުގައި އޭނާގެ ރަހުމަތްތެރިންނާ ވާހަކަ ދަށްކާ ކޮންމެހެން ކުރަން ޖެހޭ ކަންކަމުގެ ނަމުގައި ފައިސާ ދޭން އެދެއެވެ. މިފަދަ ހާލައްތަކުގައި އެއީ ކާކުކަން، އަސްލު ރަހްމަތްތެރިޔާކަން ޔަގީންކުރަންޖެހެއެވެ. މިސާލަކަށް ދެމީހުން ދެމެދުގައި ދެކެވިފައިވާ ސިއްރު ވާހަކަ އެއް ނުވަތަ އެހެނިހެން ކަންތައް ތަކުގެ ވާހަކައިން ސުވާލުކުރުމުން ސްކޭމްކުރާ ފަރާތަށް ޖަވާބު ދޭން އުނދަގޫވާނެއެވެ. ގިނަ ފަހަރަށް ޖަވާބު ނުދެވޭނެއެވެ. އަދި ޔަގީންކުރުމަށްޓަކައި ފޯނުކޮށްގެން ވާހަކަ ދެއްކިދާނެއެވެ.

ސްކޭމްތައް މިހާރަކަށް އައިސް ފެށިފައި ހުންނަނީ ސިޓީ ނުވަތަ އީމެއިލް މެދުވެރިކޮށެވެ. އަދި ޕޯން ކޯލް އާއި ޓެކްސްޓް މެސެޖް މެދުވެރިކޮށްވެސް އާދެއެވެ. މިގޮތުން ޓެކްސްޓް މެސެޖްމެދުވެރިކޮށް ނުވަތަ ފޯން ކޯލް މެދުވެރިކޮށް މިފަދަ ކަންތައް ތައް ކުރާ ފަރާތްތައް ވަރަށް ގިނަ ފަހަރަށް މިހާރު ދިވެހިންނަށްވެސް ގުޅައެވެ.

ބައެއް ސްކޭމްތަކުގައި މުއްސަނދި ބައެއް ފައިސާވެރިންގެ ނަމުގައި ފޭކް ޗެކް ހަދާފައި އިންޓަރނެޓް މެދުވެރިކޮށް ފޮނުވައެވެ. އަދި އެ ފައިސާ ހުރީ މިވެނި ތަނެއްގައި ކަމަށާއި އޭނާއަށް އެ ފައިސާ ޖަމާކޮށް ދިނުމުން އެއްބައި ދޭނެކަމަށް ބުނެއެވެ.

ޕިޝިން ސްކޭމްސް ތަކުގައި ބައެއް ފަހަރަށް ބޭންކްގެ ނަމުގައި އީމެއިލް ފޮނުވާ ބައެއް ފަރާތްތަކުގެ ބޭންކް އެކައުންޓް ތަފްސީލް ދޭންބުނެއެވެ. އެހެންނަމަވެސް މިފަދަ ކަންކަމަކީ އަޅުގަނޑުމެން ވިސްނައިގެން އުޅެފިނަމަ ގެއްލުމެއް ހުރި ކަމެއް ނޫނެވެ. ބެންކުން އާންމު ރަށްޔިތުންނަށް މޭލްކޮށްގެން އެކައުންޓް ނަންބަރު ހޯދާކަށް މަސައްކަތެއް ނުކުރާނެއެވެ. އަދި އާންމުން އަތުން އެ މައުލޫމާތު ހޯދަން ޖެހޭ ސަބަބެއްވެސް ނޯންނާނެއެވެ. އެހެނީ އެ މައުލޫމާތުތަކަކީ ބެންކްގައި ރަށްކާކުރެވިފައި ހުންނަ މައުލޫމާތެކެވެ.

ރާއްޖެގައި ފޯން މެދުވެރިކޮށް ބެންކް ނަމުގައި ގުޅާފައި އެކައުންޓްގެ މައުލޫމާތު ހޯދައިގެން ފައިސާތައް އަތުލުމުގެ ހާދިސާ ހިނގާފައިނުވާނަމަވެސް މިއީވެސް ހިނގާކަމެކެވެ. އެފަދަ ފޯންކޯލްތައް އަންނަނީ ބެންކްގެ ނަމުގައެވެ. އަދި ބެންކްގައި ހުރި ފައިސާތައް ރަށްކާތެރިކުރުމަށްޓަކައި އެކައުންޓްގައި މައްސަލައެއް އުޅޭތީ އެކައުންޓްގެ ތަފްސީލް ދޭން އެދެއެވެ. މިގޮތަށް ތަފްސީލް މައުލޫމާތު ދިނުމުން އެކައުންޓްގައި ވާ ފައިސާތައް ބޭނުންކުރެއެވެ. އެހެންނަމަވެސް ރާއްޖޭގައި ބެންކްގެ އުސޫލުތައް އޮންނަގޮތުން ކިރިޔާވެސް މިފަދަ އިސާރާތެއް ވާއިރަށް ކާޑްގެ ހިދުމަތް ވަގުތީގޮތުން މެދު ކަނޑާލާނެއެވެ. ކާރޑްގެ ތަފްސީލް މައުލޫމާތު އެގުމުން އެ ފަރާތްތަކުން ހަމަ އެއާ އެއްގޮތް ކާޑް ތައްޔާރުކުރެއެވެ. މިގޮތަށް ތައްޔާރުކޮށްފައިހުރި ކްރެޑިޓް ކާރޑް މީގެކުރިންވެސް ފުލުހުން ވަނީ ރާއްޖޭންވެސް އަތުލައިގަނެފައެވެ. އެހެންކަމުން ކާރޑްގެ މައުލޫމާތަށް ދިވެހިންވެސް ވަރަށް ބޮޑަށް ފަރުވާތެރިވުން މުހިންމެވެ.

ސްކޭމްކުރާ ފަރާތްތަކުން ވަރަށް ގިނަފަހަރަށް ސްޕައިކުރާ ސޮފްޓްވެއާރތައް ބޭނުންކުރެއެވެ. ބައެއް އެއްޗެއްސަކީ ނެޓަށް އޮޓަމެޓިކުން ގުޅޭ އެއްޗެއްސައްވާއިރު ވިސްނާނުލާ ނެޓަށް ވަދެ އެއްޗެހި ޑައުންލޯޑްކުރުމުގެ ތެރޭންވެސް އެފަދަ އެއްޗެހި ޑައުންލޯޑް ވެދާނެއެވެ. ސްކޭމްކުރާ ފަރާތްތަކުން މިގޮތަށް ބޭނުންކުރާ ކީ-ލޮގާރސް އަކީ ކީބޯރޑުން ޓައިޕްކުރާ ކޮންމެ އެއްޗެއްވެސް ރެކޯރޑްކުރާ ސޮފްޓްވެއާރއެކެވެ. މިފަދަ ތަކެތި ސައިބަ ކެފޭ ތަކުގައި ބޭނުންކޮށްފާނެތީ ފަރުވާތެރިވުމަށް ސްކޭމާ ދެކޮޅަށް މަސައްކަތްކުރާ ފަރާތްތަކުން ބުނެއެވެ. އަދި ސައިބަރ ކެފޭތަކުގައި ނެޓަށް ވަދެގެން އޮންލައިން ވިޔަފާރި ނުކުރަން އެފަދަ ފަރާތްތަކުން ގޮވާލަނީ މިފަދަ މައްސަލަތައް ހުރީމައެވެ.

ސްކޭމްތައް އާންމުކޮށް ހިނގަނީ އެފްރިކާގެ ގައުމުތަކުގައި ނަމަވެސް ، ޔުނައިޓެޑް ކިންގޑަމް، ޗައިނާ އަދި ދުނިޔޭގެ ގިނަ ގައުމުތަކުގައި އެފަދަ މަކަރުވެރި އަމަލުތައް ހިންގާ ފަރާތްތައް ގިނަކަން ފާހަގަކުރެވެއެވެ. މިގޮތުން ދުނިޔޭގައި އެންމެ މަސްހޫރުވި ނައިޖީރިއަން 419 ސްކޭމްސް އަކީ އޭގެ ސަބަބުން އެތައް ހާސް ބަޔަކަށް އޭގެ ގެއްލުން ލިބުނު ނުރައްކާތެރި ސްކޭމްއެކެވެ. އެހެންކަމުން މިފަދަ ނުރައްކާތެރި ސްކޭމްތަކާއި ބެހޭ މައުލޫމާތު ކުރިޔައް އޮތްތާނގައިވެސް ހެޔޮބަސްގެ ކިޔުންތެރިންނާއި ހަމަޔަށް ގެނެސްދޭނަމެވެ.

.ސްކޭމްކުރާ ފަރާތްތަކުން ބައެއްފަހަރަށް ފޭކް އޮންލައިން ސޮޕްތައް ހަދައިގެންވެސް މި ޖަރީމާ ހިންގައެވެ. މިފަދަ އޮންލައިން ސޮޕްތަކަށް ބަލާއިރު އަސްލު ސައިޓްތަކާ ފެންނަފެނުމުގައި މާ ބޮޑު ތަފާތެއް ނުހުރެއެވެ. އެހެންކަމުން އޮންލައިން ވިޔަފާރިކުރާއިރު ވަރަށް ރަނގަޅަށް ބަލާ ހަގީގަތް ހޯދުން މުހިންމެވެ. އަދި އިންޓަރނެޓްގައި ސާރޗްކޮށް މީހުން އެ ސައިޓްތަކާމެދު ދަށްކާފައިހުންނަ ވާހަކަތަކާއި ސައިޓްގައި ކަސްޓަމަރުންގެ ފީޑް ބެކް ހުރިތޯވެސް ބަލަންވާނެއެވެ. އެހެންކަމުން ސަމާލުކަމަށްޓަކައި އެފަދަ ބައެއް ވެބްސައިޓްގެ ނަން އާންމުކޮށްލަމެވެ.

ނޯޓް:އަޅުގަނޑު މި ލިޔުންލިޔެފައިވާނީ މިކަން ދިރާސާކޮށް އަދި މިފަދަ ސްކޭމްތައް ދިރާސާކޮށް މީހުން ހޭލުންތެރިކުރުމުގެ މަސައްކަތްކުރާ ބައެއް ފަރާތްތަކުގެ ހިޔާލާ އެކުގައެވެ. ހަމަ އެހެންމެ މިފަދަ ސްކޭމްތަކުގެ މައުލޫމާތު ހޯދުމަށް މީގެ 9 މަސްކުރިން ކުރި މަސައްކަތެއްގައި ދިމާވެ ރަހްމަތްތެރިކަން އުފެދުނު އިނގިރޭސި ރަށްޔިތެއްގެ އެހީތެރިކަންވަނީ ލިބިފައެވެ.

ސްކޭމްކުރާ ބައެއް ވެބްސައިޓްތައް